ಚಕ್ರ
ಬದುಕ ಬಣ್ಣ ಹುಡುಕುವ ನೋಟ..
ಒಮ್ಮೆ ಮೇಲೇರಿದರೆ ಕ್ಷಣದಲ್ಲೇ
ಕೆಳಗಿಳಿದು ಬಳಲುವ ತಾಕಲಾಟ
ಏರುವಾಗಿನ ಕೇಕೆ, ಸಹಜ ನಗು
ಇಳಿಯುವಾಗಿಲ್ಲ
ಹೊತ್ತ ಸಂಕಟದ ಜೊತೆಗೆ
ಮಂದಿ ಮಾತ ಕೇಳಬೇಕಲ್ಲ
ಏರುವಾಗೆಲ್ಲ ಉಬ್ಬಿಸಿ, ಕುಣಿದಾಡಿದವರು
ಕೆಳಗಿಳಿಯುವಾಗ ನಿಂತಿದ್ದರು, ತಪ್ಪಿಸಿ ಕಣ್ಣ ದೃಷ್ಟಿ
ಹೊತ್ತು ತಂದಿದ್ದೇನೆ ಬದುಕ ಕಲಿಕೆಯ
ಬಂಜೆಯಾಗಳೆಂದೂ ಸೃಷ್ಟಿ
ಏರಿಳಿತದ ನಿಜದಾರಿಯ
ನಿತ್ಯ ದರ್ಶನವೀ ಚಕ್ರ
ಏರಿದವನು ಇಳಿಯಲೇಬೇಕೆಂಬುದ ಒಪ್ಪಿಕೊಂಡರೆ
ಬದುಕು ಬೇವಿನ ಜೊತೆಗಿನ ಶರ್ಕರ
No comments:
Post a Comment